Now Reading
தமிழக அரசுக்கு சவால்விடும் தண்ணீர் பஞ்சம்!
0

தமிழக அரசுக்கு சவால்விடும் தண்ணீர் பஞ்சம்!

by Sub EditorMarch 21, 2017 5:46 pm

பருவமழை பொய்த்ததால் தமிழகத்தில் கடும் வறட்சி நிலவி வருகிறது. விவசாயத்திற்குப் போதிய நீர் இல்லாததால் பயிர்கள் கருகியதைக் கண்ட அதிர்ச்சியில் இதுவரை 200-க்கும் மேற்பட்ட விவசாயிகள் உயிரிழந்தனர்.

பருவமழை பொய்த்ததால் தமிழகம் முழுவதும் கடுமையான குடிநீர்த் தட்டுப்பாடு ஏற்பட்டுள்ளது. குறிப்பாக சென்னையில் கடும் குடிநீர் பஞ்சம் ஏற்பட்டுள்ளது. சென்னையின் நீராதாரமாக விளங்கும் புழல், செம்பரம்பாக்கம், சோழவரம், பூண்டி ஆகிய ஏரிகளில் உள்ள நீரை சென்னை மக்களுக்கு 30 முதல் 35 நாட்களுக்கு மட்டுமே விநியோகிக்க முடியும் என்ற நிலைமைதான் தற்போது இருக்கிறது.

அதனால், குடிநீர்த் தட்டுப்பாட்டைப் போக்கும் வகையில் சென்னை புறநகர் பகுதியான மாங்காடு, திருநீர்மலை உள்ளிட்ட பகுதிகளில் உள்ள கல்குவாரிகளில் தேங்கியுள்ள நீரைச் சுத்தப்படுத்தி குடிநீராகப் பயன்படுத்துவதற்கான நடவடிக்கைகளையும் தமிழ்நாடு குடிநீர் வடிகால் வாரியம் எடுத்து வருகிறது. நிலத்தடி நீர் மட்டம் குறைந்து வருவதால் ஆழ்துளைக் கிணறு மூலம் கிடைக்கும் நீரும் இனி கிடைக்காத சூழல் உள்ளது.

எனினும் சென்னையில் குடிநீர்க் குழாய்களில் தண்ணீர் வராததால், மக்கள் அடிபம்புகளைத் தேடி அலைந்து வருகின்றனர். ஆங்காங்கே இருக்கும் ஓரிரு அடிபம்புகளில் மக்கள் கூட்டம் அலைமோதுகிறது. லாரிகளின் மூலமும் 2 குடங்கள் நீரே விநியோகிக்கப்படுவதால் போதிய நீர் கிடைக்காமல் மக்கள் கடும் அவதிக்கு உள்ளாகியுள்ளனர். தற்போதே இந்த அளவிற்கு தண்ணீர் தட்டுப்பாடு நிலவுவதால் ஏப்ரல், மே மாதங்களில் நிலைமை இன்னும் மோசமடையும் அபாயம் உள்ளது.
சென்னையில் உள்ள உணவகங்கள், நிறுவனங்களும் லாரிகளின் நீரை காசு கொடுத்து வாங்கி வருகின்றன. இந்நிலையில், சென்னையின் ஒரே நீராதாரமாக இப்போதைக்கு லாரி நீர் மட்டுமே என்ற நிலை.

குழாயில் வரும் தண்ணீர் வாரத்திற்கு இரண்டுமுறை வந்து கொண்டிருந்தது. பிறகு வாரம் ஒருமுறை, இரண்டு வாரத்திற்கு ஒருமுறை என்று மாறிவிட்டது. இதுபோலவாவது இனிவரும்நாட்களில் கிடைக்குமா? என்ற அச்சம் சென்னை மக்களிடையே இப்போதே இருக்கிறது.
கோடை துவங்குவதற்கு முன்பே தண்ணீர் பஞ்சம் தலைவிரித்தாடுகிறது. இந்த நிலையில் இனிவரும் ஏப்ரல், மே மாதங்களில் கடும் வெயில் இருக்கும்.
அப்போது தண்ணீர் தேவையும் அதிகம் இருக்கும். அப்போது மாதத்திற்கு ஒருமுறை கூட தண்ணீர் கிடைக்குமா? என்று இப்போதே மக்கள் புலம்புகின்றனர்.
இந்தப் பிரச்னை ஏனோ சென்னை மக்களுக்கு மட்டுமே என்று நினைத்துவிட வேண்டாம், தமிழகம் முழுவதும் தலைவிரித்தாட இருக்கிறது என்பதுதான் பெரும் அபாயமாக மக்களை அச்சுறுத்துகிறது.

குடிநீர்த் தட்டுப்பாட்டைப் போக்க அரசு உரிய நடவடிக்கைகளை எடுக்க வேண்டும் என்பதே சென்னை மட்டுமல்லாது ஒட்டுமொத்த தமிழக மக்களின் கோரிக்கையாக இருக்கிறது.
மக்களின் தாகத்துக்கு தண்ணீர் கிடைத்தால் மட்டுமே உயிர் வாழமுடியும் என்ற நிலைக்கு தள்ளாமல் காக்க உடனடி நடவடிக்கையில் அரசு இறங்கவேண்டும் என்பதே அனைவரின் கோரிக்கையாக இருக்கிறது. சவால் நிறைந்த இந்த கோடையை எப்படி சமாளிக்கப் போகிறது அரசு?

– இரா.ராகுல்

இதையும் படிச்சிருங்க !
ரஜினி கொடும்பாவியை எரித்த சிலர் போயஸ் கார்டனில் பரபரப்பு - சென்னை செம்மொழி பூங்கா பகுதியில் நடிகர் ரஜினிகாந்தின் கொடும்பாவியை எரித்துப் போராட்டத்தில் ஈடுபட்ட தமிழர் முன்னேற்றப் படையைச் சேர்ந்தவர்களைப் போலீஸார் கைது செய்தனர். முன்னதாக, ரஜினிகாந்த் வீட்டுக்கு Read More

தங்களின் கருத்து ?
மகிழ்ச்சி
0%
வருத்தம்
0%
கோபம்
0%
சிரிப்பு
0%
நக்கல்
0%
விருப்பம்

Leave a Response