Now Reading
சென்னை அரசு பொது மருத்துவமனையில் தாக்குதல்: பயிற்சி மருத்துவர்கள் மறியல்
0

சென்னை அரசு பொது மருத்துவமனையில் தாக்குதல்: பயிற்சி மருத்துவர்கள் மறியல்

by editor sigappunadaMarch 17, 2017 12:06 pm

சென்னை சென்ட்ரலில் உள்ள அரசுப் பொதுமருத்துவமனையில் பணி பாதுகாப்பு இல்லை என்று கூறி பயிற்சி மருத்துவர்கள், மேற்படிப்பு மாணவர்கள் சாலை மறியலில் ஈடுபட்டனர். அங்கு முறையான சிகிச்சை அளிக்கப்படுவதில்லை என்று கூறி நோயாளிகளின் உறவினர்கள் மருத்துவமனை வளாகத்தில் போராட்டம் நடத்தினர். இதனால் மருத்துவமனையில் பரபரப்பான சூழ்நிலை காணப்பட்டது.

திருநெல்வேலி மாவட்டத்தை சேர்ந்தவர் விஜய்(24). இவர் மேல்மருவத்தூரில் உள்ள தனியார் பொறியியல் கல்லூரியில் 4-ம் ஆண்டு படிக்கிறார். சில நாட்களுக்கு முன்பு ஏற்பட்ட ஒரு மோதலில் விஜய் தலையில் பலத்த காயம் ஏற்பட்டுள்ளது. இதைத் தொடர்ந்து, சென்னை அரசுப் பொது மருத்துவமனையில் அவர் கடந்த 14-ம் தேதி சேர்க்கப்பட்டுள்ளார். அவருக்கு சரியான சிகிச்சை அளிக்கவில்லை என்று கூறப்படுகிறது.

இந்நிலையில், விஜய்யை பார்க்க அவரது நண்பர்கள், உறவினர்கள் என 20 பேர் நேற்று மாலை வந்துள்ளனர். நோயாளியைப் பார்க்க கூட்டமாக வந்ததால், பயிற்சி மருத்துவர்கள், மேற்படிப்பு மாணவர்கள் எதிர்ப்பு தெரிவித்ததாக கூறப்படுகிறது. மருத்துவமனையில் சரியாக சிகிச்சை அளிக்கவில்லை என நண்பர்கள் தரப்பு கூறியுள்ளது. இதனால், இரு தரப்பினர் இடையே மோதல் ஏற்பட்டுள்ளது.

இதையடுத்து, வெளியே சென்ற பயிற்சி மருத்துவர்கள், மேற்படிப்பு மாணவர்கள் மருத்துவமனை எதிரே பூந்தமல்லி சாலையில் மறியலில் ஈடுபட்டனர். தங்களுக்கு பணிப் பாதுகாப்பு இல்லை என்றும், தாக்குதல் நடத்தியவர்கள் மீது நடவடிக்கை எடுக்க வேண்டும் என்றும் கோஷம் எழுப்பினர். இதனால் அப்பகுதியில் 3 மணி நேரம் போக்குவரத்து பாதிக்கப்பட்டது.

இதற்கிடையில், உரிய சிகிச்சை அளிக்கவில்லை என்று கூறி விஜய் உறவினர்கள் மருத்துவமனை வளாகத்தில் போராட்டம் நடத்தி னர். பயிற்சி மருத்துவர்கள், மேற் படிப்பு மாணவர்கள் வெளியேறி யதால், மற்ற உள்நோயாளிகளுக்கு சிகிச்சை அளிப்பது தடைபட்டது. இதனால், அவர்களது உறவினர் களும் மருத்துவமனை வளாகத்தில் போராட்டம் நடத்தினர். இதனால், மருத்துவமனை வளாகம் முழுவதும் பரபரப்பான சூழல் காணப்பட்டது.

இதுபற்றிய தகவல் அறிந்து போலீஸ் உயர் அதிகாரிகள் விரைந்து வந்து பேச்சுவார்த்தை நடத்தினர். சுமார் 3 மணி நேரப் போராட்டத்துக்குப் பிறகு, அனைவரும் கலைந்துசென்றனர்.

இதற்கிடையில், செய்தி சேகரிக்கச் சென்ற தனியார் தொலைக்காட்சி நிருபர் மீது பயிற்சி மருத்துவர்கள் தாக்குதல் நடத்தியதாக புகார் எழுந்தது. இதற்கு எதிர்ப்பு தெரிவித்து பத்திரிகையாளர்களும் பொதுமக் களுடன் சேர்ந்து போராட்டத்தில் ஈடுபட்டனர்.

நோயாளிகளின் உறவினர்கள், பொதுமக்கள் கூறியபோது, ‘‘கடவுள் அந்தஸ்தில் இருக்கும் மருத்துவர்களின் ஒழுங்கீனமான செயல்பாடு வேதனை தருகிறது. பணம் இல்லாததால்தான் அரசு மருத்துவமனைக்கு வருகிறோம். இங்கு முறையாக சிகிச்சை அளிக்காமல் போராட்டம் நடத்தினால், நாங்கள் எங்கு போவது? பயிற்சி மருத்துவர்களின் போராட்டத்தால் 3 மணி நேரத்துக்கு மேலாக போக்குவரத்து முடங்கியுள்ளது. இதனால், அனைத்து தரப்பு மக்களும் பாதிக்கப்பட்டுள்ளனர். மருத்துவர்கள் சுயநலத்துக்காக போராடாமல் உயிர் காக்கும் பணியை செய்ய வேண்டும்’’ என்றனர்.

இதையும் படிச்சிருங்க !
பைக்கில் மதுவிற்பனை, கண்டுகொள்ளாத போலீஸ் -   டாஸ்மாக் கடைகள் மூடப்பட்டு வரும் நிலையில் கள்ளச்சந்தையில் மதுவிற்பனை ஜோராக நடந்து வருகிறது. விழுப்புரம் மாவட்டம் சின்னசேலம் காவல்நிலைய எல்லைக்குட்பட்ட பகுதியில் 9 இடங்களில் அரசு Read More

தங்களின் கருத்து ?
மகிழ்ச்சி
0%
வருத்தம்
0%
கோபம்
0%
சிரிப்பு
0%
நக்கல்
0%
விருப்பம்

Leave a Response