Now Reading
“ஒரு செடி பிடிங்கினால் ஒரு ரூபாய்”
0

“ஒரு செடி பிடிங்கினால் ஒரு ரூபாய்”

by Sub EditorMarch 21, 2017 5:41 pm

இந்தியாவில் உள்ள வளமான பகுதிகளை அழிக்கும் சீமைக்கருவேலம் ஒரு நச்சு மரம். சீமைக் கருவேல மரத்தின்கீழ் எந்தப் பறவையும் வாழ முடியாது. நிலத்தடி நீரை உறிஞ்சிக்கொண்டு நீர்வளத்தை அழித்துவிடும். நிலத்தடி நீர் இல்லை என்றால், காற்றில் வரும் ஈரத்தை உறிஞ்சி காற்றில் வெப்பத்தை அதிகப்படுத்தும்.
இந்த சீமைக் கருவேல மரம் மெக்சிகோ, கரிபியன் தீவுகளிலும், தென் அமெரிக்கா போன்ற நாடுகளை பூர்வீகமாகக் கொண்டது. இந்திய நாட்டின் வளத்தை அழிக்க, அந்நிய நாட்டு சதிகாரக் கும்பல், தொலைதூரத் திட்டத்துடன் விதைத்ததுதான் இன்று நாடெல்லாம் கருவேலம் காடாக மாறியுள்ளது. இந்நிலையில், மதுரை உயர்நீதிமன்றத்தின் அதிரடி நடவடிக்கையால் மக்களிடம் விழிப்புணர்வு ஏற்பட்டுள்ளது.
புதுச்சேரி பிரதேசம், காரைக்கால் மாவட்ட ஆட்சியர் பார்த்திபன், மாணவர்களிடம் “நீங்கள் சீமைக் கருவேலம் செடிகளை வேருடன் பிடுங்கி வாருங்கள். ஒரு செடிக்கு ஒரு ரூபாய் வழங்கப்படும் என்றும் வார இறுதியில், நகராட்சி ஊழியர்கள் பள்ளிகளுக்கு வந்து செடிகளை கணக்கெடுத்து பணம் பட்டுவாடா செய்வார்கள்” என்று அறிவித்தார். இதுகுறித்து மாவட்ட ஆட்சியர் பார்த்திபன் “சீமைக் கருவேலம் பலவிதத்தில், பல உருவத்தில் உள்ளது. மரம் வெட்டினாலும் அதன் விதைகள் விழும் இடத்தில் முளைத்துவிடும். அதனால் வேர்களை விடாத அளவுக்கு பிடுங்கிக் கொண்டேயிருந்தால், சீமைக் கருவேலம் காணாமல் போய்விடும். சமுதாயத்தின் மீது மாணவர்களுக்கும், பெண்களுக்கும் அதிகமான அக்கறையும் விழிப்புணர்வும் உள்ளது. அதனால்தான் பள்ளி மாணவர்களுக்கு முதலில் அறிவித்தேன், மாணவர்கள் போகும்போதும், வரும்போதும் கண்களில் படும் செடிகளை பிடுங்கி வருவார்கள். விடுமுறை நாட்களில் சீமைக் கருவேலம் செடிகளைத் தேடி பிடுங்கி எடுத்து வருவார்கள், ஒவ்வொரு மாணவனும், 10 செடிகள் குறையாமல் பிடுங்கி எடுத்து வருவார்கள், அவர்களுக்கு பத்து ரூபாய் கிடைக்கும், வாரத்தில் 50 ரூபாய் குறையாமல் கிடைக்கும், மாணவர்கள் கல்வியுடன் சமூக சிந்தனையும் உயரும், இதன் ரிசல்ட் இன்னும் இரண்டு வாரத்தில் தெரியும். அடுத்த கட்டமாக மகளிர் குழுவிடமும் இந்த பொறுப்புகளை ஒப்படைக்க இருக்கிறேன். அவர்களும் சமூக சிந்தனையுடன் செயல்படுவார்கள், அன்றாடம் வருமானமாகவும் இருக்கும். மக்கள் வரிப் பணமான அரசின் பணம் மக்களுக்கே திரும்பிச் செல்லும். இது ஒரு தொலைநோக்குத் திட்டம். செடிகளை விட்டால்தானே மரமாகும். சீமைக் கருவேலம் செடியை அகற்ற ஒன்று சேர்ந்து பாடுபடுவோம், பசுமை இந்தியாவை பார்ப்போம்’ என்றார். பரவாயில்லையே இது புது முயற்சியாக இருக்கிறதே! என்று புருவம் உயர்த்தி பார்க்கின்றனர் மக்கள்.

– இரா.மதன்

இதையும் படிச்சிருங்க !
பைக்கில் மதுவிற்பனை, கண்டுகொள்ளாத போலீஸ் -   டாஸ்மாக் கடைகள் மூடப்பட்டு வரும் நிலையில் கள்ளச்சந்தையில் மதுவிற்பனை ஜோராக நடந்து வருகிறது. விழுப்புரம் மாவட்டம் சின்னசேலம் காவல்நிலைய எல்லைக்குட்பட்ட பகுதியில் 9 இடங்களில் அரசு Read More

தங்களின் கருத்து ?
மகிழ்ச்சி
0%
வருத்தம்
0%
கோபம்
0%
சிரிப்பு
0%
நக்கல்
0%
விருப்பம்

Leave a Response